5個月前人在九州，book唔到aso boy，上唔到阿蘇火山，焗住變咗熊本一日遊，嗰日仲要好好天，完全係適合郊遊嘅天氣，內心一直耿耿於懷，喺熊本市hea足一日喎，硬係覺得好浪費。朝早去熊本城真心係純粹用嚟攝時間，而且入場費又唔貴，上下通町啲鋪頭邊有咁早開啫！咪入去行吓囉！由地面行到上天守閣頂層行到對大脾抽晒筋，仲要同團友H小姐講笑話晨早流流我哋做乜咁睇唔開... 事隔半年都無，喺電視望住個熊本城，震到散晒咁，修復時間要用幾十年時間計，真係喊出嚟。其實熊本嘅吉列豬扒好好食，士多啤梨又平又甜，又有時光倒流50年嘅咖啡館，要行街嘅有百貨公司有PARCO，仲有周圍都係多到驚但佢繼續開心子嘅熊本熊。熊本真係好好玩㗎，我仲要返嚟搵你㗎。
Get well soon, Kumamoto!
沒有留言:
張貼留言